*नाशिक:*
‘साप्ताहिक नाशिक परिसर’च्या १६ व्या वर्धापन दिनानिमित्त, ब्रह्माकुमारी संस्थेच्या संयुक्त विद्यमाने नाशिक रोड सेवा केंद्रात गुणवंत विद्यार्थ्यांचा गौरव आणि मार्गदर्शन सोहळा संपन्न झाला. ब्रह्माकुमारी संस्थेच्या उपक्षेत्रीय मुख्य संचालिका आदरणीय ब्रह्माकुमारी वासंती दीदीजी यांच्या अध्यक्षतेखाली झालेल्या या कार्यक्रमास नाशिक रोड सेवा केंद्राच्या संचालिका ब्रह्माकुमारी शक्ती दीदी व प्रवक्ता ब्रह्माकुमारी गोदावरी दीदी यांची प्रमुख उपस्थिती होती. यावेळी आभासी जगाच्या पलीकडे जाऊन स्वतःची ओळख निर्माण करण्याचे आवाहन करण्यात आले.
**आभासी जग आणि सत्यतेचा ध्यास**
कार्यक्रमाचे मुख्य वक्ते डॉ. राजेश जावळे यांनी ‘रील विरुद्ध रिअल लाइफ’ या विषयावर विद्यार्थ्यांना मोलाचे मार्गदर्शन केले. आजची तरुण पिढी आभासी जगाच्या मागे धावत असून, त्यामुळे अनेक विद्यार्थी मानसिक संतुलन गमावत आहेत. रीलमधील चमकधमक हे वास्तव नसून ती केवळ आकर्षित करण्यासाठी केलेली कृत्रिम मांडणी असते, असे डॉ. जावळे यांनी स्पष्ट केले. त्यांनी एका रील स्टारचे उदाहरण देत सांगितले की, आभासी जगात लाखोंचे फॅन फॉलोइंग असूनही प्रत्यक्ष जीवनात एकाकीपण वाट्याला येऊ शकते. त्यामुळे डिजिटल व्यसनापासून दूर राहून, ‘राजयोग मेडिटेशन’च्या माध्यमातून स्वतःची ओळख करून घेणे, हेच खरे जीवन असल्याचे त्यांनी अधोरेखित केले.
**ब्रह्माकुमारी वासंती दीदीजींचे आशीर्वचन**
अध्यक्षीय भाषणात ब्रह्माकुमारी वासंती दीदीजी म्हणाल्या की, ज्याने आपल्या मनावर नियंत्रण मिळवायला शिकले, त्याला जीवनात यश नक्कीच मिळते. सुखी आणि समृद्ध जीवनासाठी राजयोग मेडिटेशन अत्यंत उपयुक्त असून, प्रत्येकाने सुख-शांतीसाठी मेडिटेशनचा अवलंब करावा, असे प्रतिपादन त्यांनी केले.
**‘नाशिक परिसर’च्या यशाची घोडदौड**
कार्यक्रमाचे प्रास्ताविक ‘साप्ताहिक नाशिक परिसर’चे संपादक ब्रह्माकुमार दिलीप बोरसे यांनी केले. त्यांनी सांगितले की, ११ जुलै २०१० रोजी ब्रह्माकुमारी वासंती दीदीजी यांच्या शुभहस्ते या वृत्तपत्राचा उदय झाला. आज हे साप्ताहिक नाशिक शहरामध्ये जवळपास सव्वा लाख घरांमध्ये विनामूल्य वितरित केले जाते.
**मान्यवरांचा गौरव आणि विशेष सहकार्य**
या सोहळ्यात सीए लोकेश पारख, कवयित्री सुनंदा सूर्यवंशी आणि पोलीस कॉन्स्टेबल राजू पाटील यांचा मान्यवरांच्या हस्ते सत्कार करण्यात आला. कार्यक्रमाची सुरुवात सौ. सुनंदा सूर्यवंशी यांच्या गीत गायनाने झाली, तर ब्रह्माकुमारी गोदावरी दीदी यांनी संस्थेचा परिचय करून दिला. यावेळी दहावी आणि बारावीच्या परीक्षेत प्रथम आलेल्या विद्यार्थ्यांचा प्रमाणपत्र, स्मरणचिन्ह आणि ‘सोनी गिफ्ट’तर्फे भेटवस्तू देऊन गौरव करण्यात आला.
कार्यक्रमाचे नियोजन पंचक शाळेचे माजी मुख्याध्यापक विठ्ठल नागरे यांनी केले. या सोहळ्यासाठी जुगल जोशी कॉमर्स ॲकॅडमी आणि सोनी गिफ्ट यांचे मुख्य प्रायोजकत्व लाभले होते. यावेळी ‘नाशिक परिसर’चे कर्मचारी राजेश जाधव, अशोक सूर्यवंशी, गणेश लोहार, भूषण चोभे, अमिन शेख, रतन परदेशी, भूषण मुळे, पंकज घमेंडी, पांडुरंग दाभाडे, वैभव राक्षे आणि अर्जुन चोरे उपस्थित होते. कार्यक्रमाचे आभार प्रदर्शन अशोक सूर्यवंशी यांनी केले.
