
पालमपूर, हिमाचल प्रदेश : पालमपूर येथील पुन्नर परिसरातील कैलाश मानसरोवर राजयोग भवन येथे ब्रह्माकुमारीजच्या मीडिया विंगतर्फे “शांतता आणि सद्भावनेच्या पुनर्स्थापनेत माध्यमांची भूमिका” या विषयावर राष्ट्रीय स्तरावरील मीडिया सेमिनार आयोजित करण्यात आला. देशभरातून आलेल्या पत्रकार, संपादक आणि मीडिया विंग सदस्यांनी या चर्चासत्रात सहभाग घेतला. **या राष्ट्रीय सेमिनारमध्ये नाशिक येथून ‘साप्ताहिक नाशिक परिसर’ चे संपादक बीके दिलीप बोरसे यांनीही विशेषत्वाने उपस्थित राहून सहभाग नोंदवला.
कार्यक्रमात ब्रह्माकुमारीज मीडिया विंगचे राष्ट्रीय समन्वयक बीके डॉ. शांतनू भाई यांनी प्रास्ताविक करताना सांगितले की, समाजात वाढणारी अशांतता आणि मूल्यांचा ऱ्हास ही चिंतेची बाब आहे. अशा परिस्थितीत सकारात्मक पत्रकारितेची गरज अधिक असून, समाजाला एकत्र आणण्याचे सामर्थ्य माध्यमांमध्ये आहे.

मुख्य वक्ते म्हणून उपस्थित असलेले कुशाभाऊ ठाकरे पत्रकारिता व जनसंचार विद्यापीठाचे माजी कुलगुरू डॉ. मानसिंह परमार यांनी सांगितले की, “माध्यमे केवळ माहिती देत नाहीत, तर समाजाला दृष्टिकोनही देतात. शांततेच्या स्थापनेत माध्यमांची भूमिका अत्यंत महत्त्वाची आहे.”
मुख्य अतिथी खुशहाल शर्मा, डीआयजी व प्राचार्य, पोलीस प्रशिक्षण केंद्र दारोह यांनी ब्रह्माकुमारीजच्या मीडिया विंगच्या कार्याचे कौतुक करताना सांगितले की, पत्रकारितेमध्ये सकारात्मकता आणि अध्यात्मिकता वाढविण्याचा हा उपक्रम स्तुत्य आहे. समाजात वाढणारी अस्थिरता दूर करण्यासाठी माध्यमांची भूमिका निर्णायक ठरू शकते.

विशिष्ट अतिथी म्हणून उपस्थित श्रीमत एक्सप्रेसचे मुख्य संपादक डॉ. डी. डी. मित्तल यांनी पत्रकारितेमध्ये पारदर्शकता, जबाबदारी आणि तथ्य पडताळणीचे महत्त्व अधोरेखित केले. “अफवांपासून दूर राहून सकारात्मक पत्रकारिता करणे आवश्यक आहे,” असे त्यांनी सांगितले.
भारत एक्सप्रेसच्या स्थानिक संपादक प्रियंका कौशल यांनी पत्रकारांनी आपल्या आचार-विचारात शुद्धता आणि विश्वासार्हता जपण्याचे आवाहन केले. तर युनियन ऑफ जर्नलिस्ट पालमपूरचे अध्यक्ष संजीव बाघला यांनी पत्रकारितेत फॉलोअप स्टोरींचे महत्त्व अधोरेखित केले.

छत्तीसगड बंधुचे संपादक मधुकर द्विवेदी यांनी जिल्हास्तरीय पत्रकारितेला भारतीय पत्रकारितेची आत्मा संबोधले. “स्थानिक पत्रकार निष्पक्ष, निर्भीड आणि निडर राहणे गरजेचे आहे,” असे ते म्हणाले.
मीडिया विंगच्या उपाध्यक्ष बीके सरला यांनी पत्रकारांना सकारात्मक विचार आणि सद्भावनेचा संदेश दिला. वरिष्ठ राजयोगी शिक्षिका बीके सुनीता दीदी यांनी उपस्थितांना राजयोग ध्यानाचा अनुभव दिला. काही क्षणांच्या ध्यानाभ्यासामुळे उपस्थित पत्रकारांना शांततेची अनुभूती मिळाली.

कार्यक्रमाचे सूत्रसंचालन बीके मंजू दीदी यांनी केले, तर आभार प्रदर्शन कैलाश मानसरोवर केंद्राचे प्रभारी बीके तिलकराज भाई यांनी मानले.

